Hain ghar kii muhaafiz merii dahakii huii

Hain Ghar Kii Muhaafiz Merii Dahakii Huii Aankhein
Main Taaq Mein Rakh Aayaa Huun Jalatii Huii Aankhein
[Muhaafiz = Protector; Taaq = Shelf]
Ik Pal Bhii Kisii Mod Pe Rukane Nahiin Detiin
Kaanton Kii Tarah Jism Mein Chubhatii Huii Aankhein
Raste Mein Qadam Phuunk Ke Rakhanaa Mere Pyaaro
Hain Chaaron Taraf Shahar Men Bikharii Huii Aankhein
Yuun Us Ke Bichhad Jaane Pe Aansuu Na Bahaao
Manzar Ko Taras Jaayengii Bhiigii Huii Aankhein
[Manzar = View]
Qaatil Ke Sivaa Koii Samajh Hii Nahiin Sakataa
Kyaa Dekhatii Hain Tasht Men Rakkhii Huii Aankhein
[Tasht = Plate]
Kyaa Jaaniye Kis Khvaab Kii Taabiir Men Gum Hain
Zulfon Kii Ghanii Chaanv Men Ulajhii Huii Aankhein
‘Sagar’ Shab-E-Tiiraa Mein Ujaalon Kii Amiin Hain
Nafrat Ke Samundar Men Ye Bahatii Huii Aankhein
[Shab-E-Tiiraa = Dark Night; Amiin = Trustworthy]