Jab bagh main bulbul gaata hai tab

Jab Bagh Main Bulbul Gaata Hai, Tab Yaad Bohat Tu Aata Hai
Khushion Ke Raag Sunata Hai, Tab Yaad Bohat Tu Aata Hai
Kabhi Sham Ko Pyaar Ke Mosam Main, Kisi Gehri Jheel Ke Paani Main
Jab Sooraj Roz Nahata Hai, Tab Yaad Bohat Tu Aata Hai
Pat Jharr Ki Thandi Raaton Main, Kalay Badal Ke Aanay Se
Jab Chand Kahin Kho Jaata Hai, Tab Yaad Bohat Tu Aata Hai
Subah Se Le Kar Sham Gaye, Koi Qasid Apni Cycle Par
Jab Ghair Ki Chithi Laata Hai, Tab Yaad Bohat Tu Aata Hai
Kabhi Hijr Ka Mosam Dhalta Hai Aur Pyaasa Bhanwra Baghon Main
Jab Phool Se Milnay Jaata Hai, Tab Yaad Bohat Tu Aata Hai
Kis Se Seekha Aakhir Tum Ne Hansti Aankhon Ko Num Karna
Jab Koi Saath Nibhata Hai Tab Yaad Bohat Tu Aata Hai
Galiyon Main Khilonay Walay Ko Jab Dekh Ke Bacha Rota Hai
Aur Dast E Dua Woh Uthata Hai, Tab Yaad Bohat Tu Aata Hai
Teri Hi Yaad Main Hansta Hun Aur Phir Jab Bhi Hanstay Hanstay
Aankhon Main Aansoo Aata Hai, Tab Yaad Bohat Tu Aata Hai
Har Soorat Main Teri Soorat Hai Har Baat Main Teri Baat Khafi
Jab Koi Mann Ko Bhata Hai, Tab Yaad Bohat Tu Aata Hai
Jab Haq Ki Khatir Koi Jari Janbaz Sibahi Hur Hassnain
Sajday Main Sar Katwaata Hai, Tab Yaad Bohat Tu Aata Hai