Suna hai ke samandar main koe toofaan

Suna Hai Ke Samandar Main Koe Toofaan Aaya Hai
Parayshani Ki Zad Main Aalam‚  Insaan Aaya Hai
Samandar Say Nikal Kar Aa Gaee Hain Mouj Sarkon Per
Gharon Say Beh Kay Paani Main Sarosaamaan Aaya Hai
Huaa Hay Youn To Indonasia Main Zalzala Barpaa
Magar Zad Main Srilanka O Hindustaan Aaya Hay
Nahin Poochha Ajal Nay Naam O Mazhub Marnay Walon Say
Nah Zindah Ram Louta Hay Nah Wapas Khan Aaya Hay
Dawayen Baap Ki Laynay Jo Apnay Ghar Say Nikla Tha
Woh Khidmat Main Pidar Ki Be Dawa Be Jaan Aaya Hay
Machhairon Nay Samandar Main Jahan Ik Jaal Daala Tha
Samak Kay Saath Phans Kar Us Main Ik Insaan Aaya Hay
Main Roti Laykay Aata Hoon Gaya Tha Keh K Bachchon Say
Nah Khud Louta Nah Khanay Ka Koee Saamaan Aaya Hay
Ilahee Mout Yeh Kaisi Hay Jis Main Marnay Walon Ko
Muyassar Nah Chita Aayi Nah Qabrastaan Aaya Hay
Lutairay Loot Main Masroof Hain Aisi Tabaahee Main
Badal Kar Apna Chehra Daykhiye Shaitaan Aaya Hay
“Humtum” Hum Tasawwur Main Jo Jaa E Hadesa Ponhchay
Nazar Manzar Hamain Charon Taraf Veeraan Aaya Hay.