Ye ab khulaa hai ki koii bhii

Ye Ab Khulaa Hai Ki Koii Bhii Manzar Meraa Na Thaa
Main Jis Men Rah Rahaa Thaa Vahii Ghar Meraa Na Thaa
Main Jis Ko Ek Umr Sambhaale Phiraa Kiyaa
Mittii Bataa Rahii Vo Paikar Meraa Na Thaa
Mauj-E-Havaa-E-Shahar-E-Muqaddar Javaab De
Dariyaa Mere Na The Ki Samandar Meraa Na Thaa
Phir Bhii To Sangsaar Kiyaa Jaa Rahaa Huun Main
Kahate Hain Naam Tak Sar-E-Mahazar Meraa Na Thaa
Sab Log Apane Apane Qabiilon Ke Saath The
Ek Main Hii Thaa Ki Koii Bhii Lashkar Meraa Na Thaa